Монгол Улсын Ерөнхий сайдын ивээл дор Албан журмын даатгагчдын холбоо нь Зам, тээврийн яамтай хамтран “Автотээвэрчдийн улсын III зөвлөгөөн”-ийг 2025 оны 6 дугаар сарын 25-ны өдөр Төрийн ордны “Их Монгол” танхимд амжилттай зохион байгууллаа.
Зөвлөгөөнд 21 аймгийн үе үеийн ахмад тээвэрчид, жолооч нар, автотээврийн байгууллагуудын төлөөлөл өргөнөөр оролцсон бөгөөд Монгол Улсын Ерөнхий сайд Г.Занданшатар, Зам, тээврийн хөгжлийн сайд Б.Дэлгэрсайхан нар мэндчилгээ дэвшүүлж, тээврийн салбарын хөгжилд үнэтэй хувь нэмэр оруулж ирсэн ахмад үеийн төлөөлөл Монгол Улсын Хөдөлмөрийн баатар Д.Түмэн зөвлөгөөнийг нээж үг хэлэв.
Зөвлөгөөний хүрээнд “Монгол Улс ба автотээвэр”, “Гадаад худалдаа ба тээврийн дэд бүтцийн хөгжил”, “Тээврийн шинэ төрлүүд ба хөрөнгө оруулалтын боломж”, “Тээврийн техник технологи, аюулгүй байдал”, “Ачаа тээвэр, эрсдэл ба даатгал” зэрэг сэдвийн хүрээнд илтгэлүүд тавигдаж, салбарын тулгамдсан асуудал, хөгжлийн чиг хандлагын талаар өргөн хүрээний хэлэлцүүлэг өрнөлөө.
Даатгалын салбарыг төлөөлөн Албан журмын даатгагчдын холбооны Удирдах зөвлөлийн гишүүн, Монголын Даатгалын Холбооны Гүйцэтгэх захирал Ж.Батжаргал “Тээвэр, ложистикийн салбар дахь эрсдэл ба даатгал” сэдвээр илтгэл тавьж, тээвэрлэлтийн эрсдэлийн удирдлага, даатгалын шийдлийн ач холбогдлыг онцлон танилцуулсан юм.
